A enogastronomía da Coruña consolídase en Madrid Fusión 2026

A Deputación da Coruña pechou este mércores a súa participación en Madrid Fusión 2026 reforzando a proxección nacional e internacional da enogastronomía provincial, á que define como un auténtico “Silicon Valley”: un ecosistema baseado no talento profesional, na innovación, no coñecemento e na excelencia do produto local. Durante as tres xornadas do certame, a entidade provincial puxo en valor a riqueza gastronómica do territorio a través da campaña “A paisaxe que sabe”, cunha elevada afluencia de público e unha notable resposta do sector profesional.

Por cuarto ano consecutivo, a Deputación estivo presente nunha das feiras gastronómicas máis importantes do Estado, reafirmando a súa aposta pola enogastronomía como principal produto turístico e polo enoturismo como valor competitivo da provincia. “Alimentos de proximidade, da nosa terra e do noso mar e de primeira calidade”, destacou o vicepresidente provincial e responsable de Turismo e Promoción Económica, Xosé Regueira, quen subliñou que este tipo de escaparates permiten posicionar a oferta coruñesa no mercado internacional.

A Deputación estivo presente nunha das feiras gastronómicas máis importantes do Estado, reafirmando a súa aposta pola enogastronomía como principal produto turístico e polo enoturismo.

Ao longo do evento, os produtos de quilómetro cero foron os grandes protagonistas: galletas, queixos, mexillón, produtos da horta, viños e conservas, procedentes de practicamente todo o territorio provincial. Centos de persoas achegáronse ao stand da Deputación para coñecer de primeira man a diversidade da despensa coruñesa e as múltiples posibilidades de transformación e reinterpretación culinaria, tanto desde a tradición como desde a cociña contemporánea.

Produtores locais consolidados

As presentacións e degustacións comezaron xa na xornada inaugural con referencias consolidadas como as Gallegas de Nata da Coruña, A Despensa D’Lujo (Coristanco), A Conserveira (A Pobra do Caramiñal), os queixos de Galmesán, os produtos da horta ecolóxica de Os Biosbardos (Cambre) ou as elaboracións da marca santiaguesa Chichalovers.

A combinación de propostas permitiu amosar non só a calidade da materia prima, senón tamén a súa versatilidade e o potencial de colaboración entre empresas do propio territorio. Tamén houbo espazo para as catas, como a que ofreceu Óscar Ramil, xerente do Consello Regulador da DOP Arzúa-Ulloa, da man dunha ponencia na que puxo en valor a calidade dos queixos da denominación de orixe.

En Madrid Fusión participaron produtores locais consolidados como Gallegas de Nata, A Despensa D’Lujo, A Conserveira, Galmesán, Os Biosbardos e Chichalovers

A cociña en directo tivo un papel central na programación. Nas primeiras xornadas, Fabián Mouzo e Lara Alvarellos, do restaurante O Camiño Fala (Mazaricos), reivindicaron a cociña ligada á memoria e ao receitario popular con elaboracións como callos ao estilo de Carnés ou albóndegas de atún en salsa verde.

Silvia Facal e Rafa Varela, do restaurante Balarés (Ponteceso), ofreceron unha visión máis contemporánea do produto de baixura e da súa ligazón co Atlántico, presentando pratos como mexillón do Barbanza en escabeche caseiro ou pescada de baixura con emulsión de axada galega e chícharo bágoa. Ademais, na segunda xornada recolleron o premio ao hotel co mellor almorzo outorgado pola organización de Madrid Fusión.

Dimensión enolóxica en Madrid Fusión

A dimensión divulgativa e enolóxica estivo presente da man do sumiller e formador Alejandro Paadín, que ofreceu relatorios e catas centradas nos viños das indicacións xeográficas protexidas Terras do Barbanza e Iria e Betanzos, así como en diferentes proxectos de enoturismo da provincia. Para Regueira, esta vertente é clave para explicar que “a paisaxe tamén se bebe” e que o viño forma parte esencial da identidade gastronómica do territorio.

A dimensión divulgativa e enolóxica estivo presente da man do sumiller e formador Alejandro Paadín, que ofreceu relatorios e catas centradas nos viños das indicacións xeográficas protexidas Terras do Barbanza e Iria e Betanzos

O broche final púxoo a chef con estrela Michelin Lucía Freitas, do restaurante A Tafona (Santiago de Compostela), con dous showcookings nos que elaborou propostas de alta cociña vencelladas ao territorio, como cabaza asada de Os Biosbardos con pesto emulsionado de Galmesán, mexillón tigre e guiso de navallas con salsa verde de algas, empregando produtos da provincia.

Segundo destacou o vicepresidente provincial, a participación en Madrid Fusión responde a unha estratexia sostida no tempo, iniciada hai catro anos, cando a enogastronomía se consolidou como o primeiro produto turístico da provincia. “A nosa cadea de valor enogastronómica é o noso verdadeiro Silicon Valley”, afirmou, un ecosistema que, engadiu, é necesario coidar, protexer e proxectar, especialmente no ámbito internacional.