O Mercado de Produtores, escaparate de emprendedores cun proxecto único

O pasado venres, 19 de setembro, o Hotel Oca Puerta del Camino de Santiago de Compostela viviu unha xornada única coa celebración dun Mercado de Produtores organizado no marco do Circuito de Golf e Croquet TUR 43, e en colaboración coa Deputación da Coruña. Esta feira, na que participaron un total de 12 expositores, e entre os que se atopaban marcas e iniciativas como Raizame; Martietas de Fío; Cafés Lúa; Galmesán; Casa da Avoa; Pandejuevo; Xearte Brigitte; Ben Senta; Galuriña; Gallegas de Nata; Bico de Xeado; e Casa Abelleira, puxo o foco na produción local e de proximidade, dando visibilidade a proxectos anovadores, sostibles e a pequenos produtores.

O mercado celebrouse de forma paralela á romería organizada por TUR 43 para recibir aos xogadores que ao día seguinte participarían na Gran Final da V edición do Circuito de Golf e na II do de Croquet. Desta forma, os asistentes ao circuito, tanto de Galicia como de Asturias e Portugal puideron coñecer de primeira man os produtos destes emprendedores, así como degustar os seus pratos estrela. Dende galletas, con e sen gluten, ata embutidos e cafés. Os expositores reflexaron a heteroxeneidade e riqueza da gastronomía galega, con especial énfase na produción da provincia da Coruña.

O mercado celebrouse de forma paralela á romería organizada por TUR 43 para recibir aos xogadores que ao día seguinte participarían na Gran Final da V edición do Circuito de Golf e na II do de Croquet

O evento conxunto foi todo un éxito, tanto de asistencia como polo impacto e a visibilidade que se lle deu aos produtos de calidade diferenciada. «Para nós participar nestas iniciativas é unha oportunidade para dar a coñecer os nosos produtos a un segmento da poboación e uns públicos aos que non teríamos acceso noutros contextos», sinalou Victorino Pedrosa, delegado de Produción e Ventas de Casa da Avoa, que leva máis dunha década combinando o nostálxico saber facer das tradicións, pasadas de xeración a xeración, coa modernidade e fusión de sabores que demandan os novos públicos.

O packaging, por outra banda, é outra das súas fortalezas. «Intentamos facer un deseño que atraia, que sexa representativo do que somos en Casa da Avoa e dos valores que defendemos, ao tempo que se diferencie doutras marcas que poidan facer algo parecido», asegurou.

Escaparate para os pequenos produtores

Este sentimento de pertenza e gran escaparate para os pequenos produtores de mercados e feiras nas que partipan ao abeiro da Deputación que manifestou Pedrosa tamén o secundou a súa compañeira de batallas, Carmela Cano, xerente de Galmesán, coa que coincidiu en máis ocasións presentando os seus produtos. «Estes eventos son un espazo único para poñer en valor a produción local e dar a coñecer os nosos produtos. Neste caso, a un perfil moi concreto e específico, como son os xogadores de golf», manifestou, remarcando a calidade que caracteriza a produción dos seus queixos da comarca de Arzúa, e que é «o noso valor diferencial».

O evento conxunto foi todo un éxito, tanto de asistencia como polo impacto e a visibilidade que se lle deu aos produtos de calidade diferenciada

Pablo Suárez e Gisela Suárez, de Gallegas de Nata, tamén concordaron. «Ter a posibilidade de participar neste Mercado de Produtores permítenos falar cara a cara con potenciais clientes e poñer en valor as nosas galletas, mesmo presentarllas a xente que non as coñece. É unha gran oportunidade de dar a coñecer a nosa marca, e tamén ver como traballan os compañeiros», afirmaron pai e filla, xerente e responsable de comunicación da empresa, especializada na produción deste doce típico, coa receita segreda da avoa.

As impresións dos xogadores e familiares que se achegaron a este Mercado de Produtores foron tamén moi boas, certificando o éxito dunha iniciativa que non só pretendía unir o deporte e a gastronomía, senón tamén funcionar como catalizador dos destinos turísticos e, en especial, da provincia da Coruña e de Galicia no seu conxunto. Durante case tres horas puideron probar diferentes produtos e aprender da man dos propios produtores como é a elaboración de cada un destes manxares gastronómicos, como traballan, e as dificultades que teñen para promocionarse nun mercado tan saturado como o actual.