Diego Armando: «Para nós é clave lograr a atención nunha feira que presenta tanta oferta»

Bonilla a la Vista é unha desas marcas emblemáticas que se encontra gravada no ideario colectivo, especialmente dos coruñeses. A empresa familiar herculina fabrica as patacas fritidas máis coñecidas e recoñecidas mundialmente, grazas á súa aparición en series e películas estranxeiras, que a catapultaron á fama internacional.

Pero, antes do seu impacto na cultura popular de medio mundo, Bonilla a la Vista despuntou como marca punteira na comunidade galega, apostando por produtos naturais e de calidade, e recuperando a receita tradicional coa que conquistaron a todo tipo de padais. Non só coas patacas fritidas, senón que tamén colleitaron éxito coa elaboración do seu chocolate con churros, unha delicia que promete non deixar indiferente a ninguén.

Diego Armando García é o responsable de Ventas da compañía, e un dos rostros máis coñecidos da mesma, xa que acode con asiduidade ás numerosas feiras e mercados gastronómicos que poñen en valor e dan visibilidade á produción local, dentro e fóra das fronteiras autonómicas (e internacionais).

Entre elas atópase a súa recente participación no San Sebastián Gastronomika, así como noutras iniciativas promovidas dende a Deputación da Coruña, coma o Mercado de Produtores, celebrado o pasado 19 de setembro no hotel Oca Puerta del Camino de Santiago de Compostela, en colaboración co Circuíto de Golf e Croquet TUR 43, do que Bonilla a la Vista é colaborador habitual.

Galicia destaca pola súa rica tradición gastronómica. Como logran, dende Bonilla a la Vista, levar ese sabor único a diferentes públicos cun produto tan particular como son as patacas fritidas?

As patacas fritidas son un produto moi arraigado no mercado galego, que é o principal mercado da empresa. Se a isto lle engadimos que non se modificou en ningún momento a receita, nin a maneira de preparalas, isto convérteas nun produto moi recoñecible. Nós tratamos de trasladar aos nosos consumidores algo máis que un aperitivo, un produto con historia, tradición e máxima calidade.

É frecuente que participen en eventos gastronómicos de primeiro nivel, tanto nacionais como internacionais. Consideran estas feiras o mellor escaparate para poñer en valor os seus produtos?

Sen dúbida, unha feira gastronómica é un punto de encontro da empresa cos nosos cliente, futuros compradores ou, incluso, cos clientes finais. Nelas sempre ofrecemos unha mostra do produto, xa que non hai mellor carta de presentación que a degustación da nosa pataca.

As patacas fritidas son un produto moi arraigado no mercado galego, que é o principal mercado da empresa

E falando de feiras… Madrid Fusión, San Sebastián Gastronómika e o Mercado de Produtores da Deputación da Coruña son só algúns dos eventos aos que Bonilla a la Vista asiste con frecuencia para promocionar as súas patacas fritidas. Que supón para vós estar alí e compartir espazo con tantos produtores diferentes?

Nós acudimos a estes eventos como representantes, e baixo o amparo da Deputación da Coruña. Son eventos enriquecedores onde se establecen nexos con diferentes empresas, e sempre é un orgullo para nós participar neles. Estamos moi agradecidos á Deputación por contar con nós en todos estes actos, é unha sinerxía moi exitosa para ambas partes.

E en eventos de tal magnitude, como logran destacar entre tantas propostas? Cal diría que é o valor diferencial de Bonilla a la Vista?

Para nós é clave lograr a atención nunha feira que presenta tanta oferta, así como tamén o é empatizar co visitante, ofrecer degustacións da nosa pataca, dedicarlle a mellor atención a cada visita, e ser capaces de transmitir que temos un produto de máxima calidade e de fácil acceso.

Non destinamos partidas de inversións específicas en marketing e publicidade para introducirnos en novos mercados pero, aínda así, conseguimos ter presenza neles

Bonilla a la Vista logrou penetrar en mercados internacionais con gran éxito. Cal é o segredo para conectar con consumidores de diferentes países e contornas culturais e sociais?

É unha pregunta complicada, non hai unha tecla que garanta o éxito. Non destinamos partidas de inversións específicas en marketing e publicidade para introducirnos en novos mercados pero, aínda así, conseguimos ter presenza neles. Ao final, a clave está na calidade do produto que ofertamos, no boca a boca, e na presenza nestas feiras gastronómicas, que nos dan a oportunidade de que a xente nos coñeza e probe os nosos produtos.