Diego Trillo: «A posibilidade de dar a coñecer a nosa marca fóra de Galicia é fundamental»

Diego Trillo, o pasteleiro autodidacta que conquistou A Costa da Morte co seu proxecto personal, Pandejuevo, e agora leva os sabores da comarca por toda Galicia, foi un dos participantes no Mercado de Produtores celebrado o pasado 19 de setembro no hotel Oca Puerta del Camino de Santiago, unha iniciativa organizada pola Deputación da Coruña en colaboración co Circuito de Golf e Croquet TUR 43.

Que significa para vós participar neste mercado, nun evento que mestura deporte, turismo e gastronomía, como oportunidade para dar a coñecer Pandejuevo?

Para nós, estar presentes neste tipo de circuítos e eventos é unha oportunidade única. A nosa marca, en moitos casos, funciona como un souvenir, unha lembranza vinculada á identidade galega, especialmente á da Costa da Morte. Participar nun evento como o Circuíto de Golf e Croquet TUR 43, que reúne xogadores de Galicia, Asturias e Portugal, permítenos reforzar a nosa presenza e abrir novos mercados.

Ao estar presentes en circuítos de turismo e gastronomía, podemos amosar que Galicia ten produtos de calidade diferenciada, que non só se consumen localmente, senón que tamén teñen un gran potencial para conquistar outros públicos. Outro aspecto que destacamos é que este evento atrae a un público que valora a calidade e a singularidade, e ao final, o que nós ofrecemos encaixa perfectamente nesa filosofía.

Participar neste tipo de iniciativas tamén vos permite darvos a coñecer fóra de Galicia. Noutros lugares como Asturias ou Portugal, a vosa marca pode ser menos coñecida. Como valorades a posibilidade de chegar a novos públicos a través deste circuíto internacional?

Exactamente. A posibilidade de dar a coñecer Pandejuevo fóra de Galicia é fundamental. En lugares como Asturias ou Portugal, aínda que estamos facendo un traballo para estar presentes, non somos tan coñecidos como na nosa propia provincia. O circuíto permite que a nosa marca chegue a novos consumidores, tanto de dentro como fóra de Galicia, o que é unha vantaxe importante.

Ademais, estar en contacto con xogadores e visitantes doutros lugares tamén nos permite abrir novos horizontes no mercado. Por exemplo, en Galicia ou na provincia da Coruña xa temos máis visibilidade, pero noutras zonas, especialmente no resto de España ou en Portugal, aínda estamos a darnos a coñecer. Neste sentido, participar nun evento que xunta a tantas persoas e que ten unha dimensión internacional, é unha excelente oportunidade para chegar máis lonxe.

Ao estar presentes en circuítos de turismo e gastronomía, podemos amosar que Galicia ten produtos de calidade diferenciada

Falaches de abrir novos mercados, pero este tipo de eventos tamén serve como escaparate para amosar a calidade do produto. Que significa para vós participar nun mercado de produtores como este no que se combinan distintas marcas e produtos galegos?

Para nós, participar neste tipo de mercados é, sen dúbida, unha gran oportunidade para dar visibilidade a toda a nosa gama de produtos. A xente que se achega ao circuíto de golf non só está interesada no deporte, senón tamén na gastronomía e no turismo, o que crea un ambiente perfecto para amosar o que facemos.

O mercado de produtores é como un escaparate no que as persoas que nos visitan poden descubrir a calidade dos nosos produtos e probar directamente o que ofrecemos en Pandejuevo. Non só se trata de vender, senón tamén de dar a coñecer o noso traballo, a nosa filosofía e a importancia dos ingredientes cos que facemos as nosas galletas, pan e doces. E, ademais, podemos interactuar directamente co consumidor, algo que é moi valioso para nós.

Neste tipo de eventos, onde se reúnen moitas marcas e produtores, tamén hai moita competencia. Participastes nalgún outro evento semellante organizado pola Deputación ou outras feiras que vos permitiran chegar a públicos novos?

Si, de feito, o último evento no que estivemos foi no Festival da Luz, que tamén é un mercado de produtores moi interesante. Este festival atrae a un público moi diverso e a xente que se achega está moi interesada en descubrir produtos locais e artesanais. É unha feira que tamén movía moita xente e nos permitiu interactuar con persoas de diferentes lugares.

Comparado co Festival da Luz, esta xornada é algo máis tranquila. O público é diferente, xa que se trata de xogadores de golf cun perfil máis específico, e moitos deles tamén veñen acompañados das súas familias. Por iso, podemos establecer conversas máis tranquilas, o que facilita a conexión co consumidor.

O mercado de produtores é como un escaparate no que as persoas que nos visitan poden descubrir a calidade dos nosos produtos

Cal é o valor diferencial dos vosos produtos, como pan de xogo, galletas ou doces, respecto doutras marcas?

O noso valor diferencial é, sen dúbida, o mimo e o coidado co que facemos os nosos produtos. No obradoiro sempre dicimos que a man é o que nos diferencia. Cada galleta, cada etiqueta, todo está feito de xeito artesanal e manual. Colocamos cada etiqueta e cada galleta a man, unha a unha. Isto dálle un valor único ao produto.

Ademais, tamén prestamos moita atención aos ingredientes. En Pandejuevo traballamos co mellor produto posible, o que se reflicte na calidade final do noso pan, galletas ou doces. Neste sentido, a nosa filosofía é ofrecer sempre un produto auténtico e coidado, que destaque polo sabor e a calidade.

Cal é o produto que máis se consume ou que máis gusta entre os vosos clientes? Hai algún produto que vos sorprenda polo éxito que está tendo?

Sen dúbida, a galleta de chocolate é a máis vendida, é a que máis demandan os clientes. Pero tamén acabamos de sacar unha nova galleta de sementes, que está tendo moito éxito e está a gustar moito. É unha combinación moi interesante que se está a recibir de xeito moi positivo.

Aínda así, a que máis esperamos todos é a galleta de Nadal. Xa estamos comezando a produción e sairá ao mercado en outubro. Sabemos que vai ser un éxito, xa que sempre ten moita aceptación e é unha das que máis se agardan ao longo do ano.