Mar Ferreiro: «A desestacionalización é un elemento clave do turismo deportivo»

Mar Ferreiro Broz é a directora territorial da Consellería de Presidencia, Xustiza e Deportes na provincia da Coruña, e este ano participou por primeira vez nas celebracións de peche do Circuíto TUR 43 Galicia Calidade, que conta coa colaboración e patrocinio da Xunta de Galicia a través da Axencia Turismo de Galicia. Esta edición foi moi especial, xa que levou da man a todos os campos a marca de garantía Galicia Calidade, certificando uns produtos enogastronómicos de primeira, e poñendo en valor á comunidade como destino turístico por excelencia.

Que supón para a provincia da Coruña acoller a gran final do Circuíto TUR 43 Galicia Calidade tras percorrer Galicia, Asturias e o norte de Portugal?

A Xunta sempre celebra a organización de competicións deportivas deste calado na nosa comunidade. É bo para o deporte, para a nosa imaxe, e tamén para a economía.

O circuíto combina deporte, turismo e gastronomía. Que potencial ten esta fórmula para promocionar Galicia como destino de turismo deportivo?

É inmellorable: Galicia teno todo para acoller grandes citas deportivas, e sen dúbida a gastronomía, a nosa paisaxe e a nosa cultura son alicientes fundamentais tamén para o turismo deportivo.

Galicia teno todo para acoller grandes citas deportivas

Que impacto pode ter unha competición deste tipo na actividade turística e económica dos municipios que acollen as diferentes probas, especialmente fóra das épocas de maior afluencia turística?

A desestacionalización é un elemento clave do turismo deportivo: axúdanos a lograr que Galicia sexa destino turístico durante todo o ano, non só nos períodos vacacionais, derivándose ingresos máis estables e continuos.

O circuíto incorpora tamén a promoción de produtos galegos e da marca Galicia Calidade. Que valor ten asociar o deporte á gastronomía e aos produtos de calidade da comunidade?

Galicia Calidade traballa na promoción da marca de garantía e tamén nos produtos e servizos certificados. Eventos como o Circuíto TUR 43 Galicia Calidade preséntanse como un dos escaparates óptimos para dalos a coñecer. Deporte e saúde van ligados sempre a alimentación de calidade. Ademais, este circuíto ten varias probas fóra da nosa comunidade, o que permite levar os nosos produtos tamén aos mercados exteriores, e que se dean a coñecer.

Eventos como o Circuíto TUR 43 Galicia Calidade preséntanse como un dos escaparates óptimos

Esta edición permitiu aos participantes coñecer diferentes destinos do norte e noroeste peninsular. Que importancia ten esta dimensión territorial e de intercambio para un evento destas características?

É fundamental dar visibilidade a Galicia como destino de turismo deportivo dentro dun territorio máis amplo, e favorecer o fluxo de visitantes. O propio Circuíto TUR 43 Galicia Calidade busca promocionar as comunidades da España Verde e Portugal como destinos de golf, poñendo en valor a súa riqueza cultural, paisaxística e gastronómica.

A provincia da Coruña conta con escenarios como o Real Club de Golf de La Coruña e o Real Aeroclub de Santiago. Que oportunidades ofrece o territorio para seguir atraendo competicións deportivas vinculadas ao turismo?

Galicia é o perfecto escenario para competicións deportivas polos seus recursos naturais e paisaxísticos, e tamén polas súas instalacións deportivas. Galicia conta cunha rede estable de recursos materiais (instalacións e equipamentos) e humanos (tecido deportivo e a colaboración da Administración autonómica) para que o deporte siga medrando, tamén atraendo competicións deportivas. 

Galicia é o perfecto escenario para competicións deportivas polos seus recursos naturais e paisaxísticos, e tamén polas súas instalacións deportivas

Que papel desempeña a colaboración entre administracións, entidades deportivas e empresas para consolidar iniciativas como o Circuíto TUR 43 Galicia Calidade?

TUR 43 conta coa colaboración da Xunta de Galicia, o que é esencial para impulsar este tipo de iniciativas. O Plan de Patrocinios da Xunta é unha das ferramentas que consolidan esta relación que contribúe á promoción turística de Galicia e permite reforzar a visibilidade da marca Galicia Calidade.

O circuíto alcanza xa a súa sexta edición de golf e terceira de croquet. Que futuro lle ve e que retos debe afrontar Galicia para seguir medrando como destino de turismo deportivo?

Galicia é unha comunidade eminentemente polideportiva, e medra ano a ano como destino de turismo deportivo en todas estas modalidades, tamén no golf e no croquet, esta última recoñecida en Galicia dende hai só un ano, pero cun gran potencial, como o caso do golf, que pechou case xa as 13.000 licenzas neste 2026.