Sabores que rememoran a cociña das avoas: o segredo dun produto artesanal que conecta co pasado

Manuel Abelleira é o actual xerente de Casa Abelleira, famosa polos seus chicharróns, que fan as delicias de quen os proba. O segredo, confesa este emprendedor, que participou no Mercado de Produtores organizado pola Deputación da Coruña e no marco do V Circuíto de Golf e II de Croquet TUR 43, o pasado 19 de setembro, «está na calidade do seu produto», que recorda a outros tempos, así como na «trazabilidade», xa que se encargan de todo o proceso de elaboración dun produto típico da gastronomía galega.

O Circuíto de Golf e Croquet TUR 43 fusiona deporte, gastronomía e turismo. Que valor che aporta a ti como produtor a presenza nestes eventos?

O valor que me aporta é estar no mesmo espazo que outras marcas e produtores referentes. Estamos ao lado de marcas moi recoñecidas, e iso é un referente importante para nós. Participar nese ambiente dános a oportunidade de relacionarnos co resto de produtores e, ademais, de darnos a coñecer no sector.

Comentaches que, aínda que hai outros eventos de promoción, o que fai único este en concreto é que reúne a produtores de diferentes sectores. Como cres que isto beneficia a súa participación?

Si, claro. A vantaxe de coincidir con produtores de diferentes sectores é que permite aprender como traballan outros, e tamén facilita o networking. Ademais, isto permite que nos poñan en contacto con novos clientes e, sobre todo, con persoas de fóra, como xogadores de Portugal, Asturias e tamén de Galicia. O boca a boca funciona moito, e se un cliente queda contento cun produto, logo comparte a súa experiencia, o que é un gran plus para nós.

Cantas veces participaches neste tipo de eventos? E que achega Casa Abelleira nesta visibilidade?

Participamos no Circuíto de TUR 43 desde o principio, pero tamén estamos en fases de probas noutros eventos, como os mercados de produtores organizados pola Deputación. De feito, esta é a nosa primeira vez nese tipo de feiras. É unha boa experiencia, pero admito que nos pillou un pouco a contrapé porque teríamos que estar mellor preparados. Aínda así, sabemos que o noso produto fala por si só cando a xente o degusta. Por exemplo, o ano pasado, o que máis se pedía no Circuíto de Golf foron os chicharróns, algo que, sinceramente, me fixo sentir moi orgulloso.

A vantaxe de coincidir con produtores de diferentes sectores é que permite aprender como traballan outros, e tamén facilita o networking

Entón, a visibilidade que vos dá este tipo de eventos é clave para a vosa expansión?

Si, totalmente. Aínda que quizais non teñamos o tempo suficiente para estar presentes fisicamente en todos os eventos que nos gustaría, a visibilidade que nos dá a participación neste tipo de feiras é incalculable. Gustaríanos poder participar máis, pero temos moitos outros compromisos. Porén, sempre que a xente probou os nosos produtos, o feedback é moi positivo, e o boca a boca fai o resto.

Comentaches antes que estades en proceso de expansión. Estades considerando meter os vosos produtos en tendas gourmet?

Si, estamos nese proceso. O que pasa é que como é algo que require tempo, estamos traballando na ampliación do noso obradoiro. De feito, estamos a sacar novas licenzas para poder vender fóra da provincia. Actualmente, temos unha licenza que só nos permite vender na provincia da Coruña, pero queremos expandirnos tamén a outras zonas, como Pontevedra, Lugo, León ou mesmo Madrid. Estamos nese proceso de crecemento.

O que máis se destaca dos nosos produtos, sobre todo dos chicharróns, é a súa calidade e o sabor tradicional que transmiten

Que destacarías dos vosos produtos? Que vos fai únicos no mercado?

O que máis se destaca dos nosos produtos, sobre todo dos chicharróns, é a súa calidade e o sabor tradicional que transmiten. Moita xente opina que saben como cando os facían as súas avoas ou as súas nais. A nosa produción é moi artesanal e, a pesar de que non se poden facer grandes cantidades, garantimos que cada produto é de máxima calidade. Para nós é moi importante controlar todo o proceso: dende a compra dos animais, pasando polo matadoiro e a elaboración no noso obradoiro. Facemos todo nós mesmos, sen terceiras persoas, o que nos permite asegurar unha trazabilidade total e un sabor único. Este control total é algo que non todos os produtores poden ofrecer, e iso é unha das cousas que nos diferencia.

Parece que o proceso artesanal e o control sobre a produción son clave na vosa filosofía. Como ves o futuro para Casa Abelleira?

O futuro para nós pasa por seguir crecendo sen perder a esencia do que facemos. Queremos seguir mantendo esa calidade e ese sabor auténtico, que para nós é o máis importante. A medida que nos expandimos, tamén queremos garantir que a nosa produción siga sendo tan artesanal coma sempre, porque iso é o que nos fai diferentes.