Victorino Pedrosa: «Coidamos moito a imaxe e a presentación, porque sabemos que ‘primeiro se come cos ollos'»

Victorino Pedrosa forma parte da terceira xeración de Casa da Avoa, unha empresa dedicada á elaboración de produtos cárnicos de calidade e gourmet. A reconversión fixérona hai unha década, da man, precisamente, deste emprendedor, que decidiu tomar o relevo do seu pai e do seu avó, e continuar coa tradición familiar.

Non obstante, Pedrosa era consciente das dificultades que implicaba sacar adiante unha empresa destas características no mercado actual, polo que apostou por dárlle un cambio de imaxe a Casa da Avoa, defendendo por enriba de todo a calidade, o sabor, pero tamén a necesidade de crear un packaging atractivo, que contase unha historia que os compradores puidesen sentir como propia. Así naceu a nova e mellorada Casa da Avoa, un proxecto persoal que está chegando a mercados e feiras gastronómicas de todo o país.

Un dos últimos eventos nos que participaron foi o Mercado de Produtores, organizado pola Deputación da Coruña, en colaboración co Circuito de Golf e Croquet TUR 43, e que se celebrou o pasado 19 de setembro no hotel Oca Puerta del Camino de Santiago de Compostela.

Como produtor, que che aporta participar nun evento que une deporte e promoción de produtos galegos?

Pois, en principio, parécenos unha moi boa idea. Todo o que sexa dar a coñecer e promocionar produtos feitos de forma artesanal e con coidado pola calidade, parécenos moi positivo. E se ademais se combina cun evento deportivo e cun público tan variado, o impacto aínda é maior. É un escaparate excelente.

Nesta edición do V Circuíto de Golf e II de Croquet TUR 43 celébrase por primeira vez un mercado de produtores. Vedes esta proposta como unha boa oportunidade para chegar a novos públicos?

Sen dúbida. A final reunirá a moita xente, non só xogadores, senón tamén acompañantes e público en xeral. Parécenos unha idea moi acertada que se invite a outros produtores a participar, mesmo aqueles que non estiveron presentes nos campos durante o resto do circuíto. É unha maneira de achegar os produtos a potenciais clientes nun contexto diferente.

Todo o que sexa dar a coñecer e promocionar produtos feitos de forma artesanal e con coidado pola calidade, parécenos moi positivo

Pensas que eventos como este poden complementar ou mesmo mellorar as feiras profesionais máis tradicionais?

Si, porque aquí tes unha relación directa co consumidor. Podes explicar como se elabora o produto, que ingredientes leva, cal é a filosofía da marca… E tamén recibes o seu feedback: que lles parece o sabor, a presentación, o formato… É unha forma moi enriquecedora de interactuar, tanto co público como con outros produtores. Ademais, é un ambiente máis relaxado e próximo.

Participastes noutras iniciativas de promoción impulsadas pola Deputación?

Si, xa levamos varios anos participando. Por exemplo, estivemos no Festival da Luz, en Boimorto, tamén da man da Deputación. No noso caso, é o segundo ou terceiro ano que colaboramos, e sempre quedamos moi contentos coa experiencia.

Falando do voso traballo, que tipo de produtos elaborades e que vos diferencia doutros?

Somos Casa da Avoa, unha marca que elabora produtos cárnicos en conserva, tipo gourmet. Temos tanto embutidos como outras elaboracións un pouco diferentes, que procuran saír do máis tradicional sen perder a esencia. Coidamos moito a imaxe e a presentación, porque sabemos que “primeiro se come cos ollos”. Pero tamén buscamos combinacións de sabores innovadoras, sen renunciar ao sabor auténtico de sempre.

O Mercado de Produtores é unha forma moi enriquecedora de interactuar, tanto co público como con outros produtores

Buscades entón atraer tanto a consumidores tradicionais como a un público novo?

Exacto. A verdade é que nos sorprendeu ver como tamén a xente maior, acostumada ao máis tradicional, acepta perfectamente os nosos produtos. Conseguimos manter o sabor de sempre, pero cun toque actual, e iso gusta a todas as idades.

Que vantaxe ves en participar nun evento onde hai produtores de distintos sectores?

Pois sempre digo que cantos máis sexamos, mellor. A xente móvese por espazos onde hai variedade. E ao mesmo tempo, entre nós, aprendemos moito uns dos outros. Sempre colles ideas, compartes experiencias… Ao final créase unha pequena comunidade. No noso caso, levamos xa 11 anos neste sector e coñecemos a moita xente. Moitos dos que están aquí xa son compañeiros habituais, e mesmo amigos.

Conseguimos manter o sabor de sempre, pero cun toque actual, e iso gusta a todas as idades

Para rematar, que cres que é o que máis valoran os consumidores dos vosos produtos?

Sen dúbida, a combinación de calidade, presentación e innovación. Coidamos moito o que facemos, e iso nótase. Buscamos diferenciarnos nun sector moi tradicional como é o dos embutidos, pero sen perder o respecto polo sabor de sempre.