A Coruña celebrou o Mercado dos Faros para revalorizar o patrimonio marítimo galego

A cidade da Coruña acolleu o pasado 1 de novembro o Mercado dos Faros, un evento cultural que tivo como obxectivo poñer en valor os faros de Galicia, símbolos do seu patrimonio histórico, social e cultural. A cita tivo lugar no Hotel NH Collection Finisterre, e durante toda a xornada, desde as 12:00 ata as 21:00 horas, os asistentes puideron desfrutar de diversas actividades, expositores e propostas culturais.

A conselleira de Economía e Industria, María Jesús Lorenzana, asistiu á inauguración do evento e destacou que o Mercado dos Faros é unha “orixinal proposta” que pón en valor o patrimonio fareiro de Galicia, ofrecendo actividades gastronómicas, de artesanía, cultura e ocio.

A iniciativa, promovida por Océano Azul, quixo destacar a importancia dos 44 faros que alumean a costa galega, entre eles a icónica Torre de Hércules, Patrimonio da Humanidade, e outros puntos emblemáticos como as Cíes, Corrubedo ou o Semáforo de Fisterra. A pesar da súa relevancia, o evento subliñou a falta de visibilidade destes monumentos e o seu papel fundamental protexendo as comunidades costeiras e guiando aos navegantes.

A iniciativa, promovida por Océano Azul, quixo destacar a importancia dos 44 faros que alumean a costa galega, entre eles a icónica Torre de Hércules

O Mercado dos Faros contou cunha variada oferta de artesanía, arte, alimentación e complementos, pero tamén se celebrou un certame de pintura rápida, no que os participantes plasmaron a súa visión do faro da Torre de Hércules. As obras foron expostas pola tarde e sometidas á valoración dun xurado profesional, ademais do voto popular. Os mellores artistas foron premiados con cartóns regalo e premios en metálico.

Visitas á Torre de Hércules

Outro dos atractivos do evento foron as rutas guiadas á Torre de Hércules, nas que os asistentes puideron coñecer mellor a historia do faro e a súa contorna. O aforo para estas visitas foi limitado, e os participantes recibiron tamén unha entrada para acceder ao faro.

A Axencia de Turismo de Galicia colaborou na organización do evento, que, tras a súa parada na Coruña, chegará a diferentes cidades costeiras de Galicia. Tamén contou coa participación de marcas galegas vinculadas ao mundo do mar.

Outro dos atractivos do evento foron as rutas guiadas á Torre de Hércules, nas que os asistentes puideron coñecer mellor a historia do faro e a súa contorna

O evento, que busca promover o turismo e a cultura galega, foi apoiado por varias institucións, entre elas a Xunta de Galicia, Turismo de Galicia, Deputación da Coruña, e Turismo da Coruña, que colaboraron na difusión e organización do Mercado dos Faros.

Así, baixo o lema “A mirada da Torre”, o evento serviu como escaparate da riqueza cultural e histórica de Galicia, subliñando a conexión entre os faros e a identidade mariñeira da comunidade.