O Mercado dos Faros: a nova proposta comercial e de ocio recala na Coruña

En Galicia existen 44 faros que van dende a milenaria Torre de Hércules, Patrimonio da Humanidade, ata Silleiro, pasando polas Cíes, Corrubedo, o Semáforo de Fisterra, Vilán, Prior, Ortegal, ou a Illa Pancha. Así, sendo a principal comunidade española en número de faros, nunca xurdiu a necesidade de poñer en valor estas guías lumínicas, e menos se asociou a súa importancia co servizo que levan séculos prestando ás cidades que viven ao amparo das súas luces protectoras.

É precisamente por esta falta de reivindicación do que xa é todo un referente da tradición secular de Galicia polo que dende Océano Azul Comunicación deseñaron un mercado que levará a moitas cidades os elementos máis sorprendentes que combinan o urbano-rural e a cultura náutica.

Así pois, o nomeado Mercado dos Faros é unha innovadora iniciativa que xorde da necesidade de revalorizar os faros como vestixio do patrimonio histórico, social e cultural da comunidade, invitando a firmas, marcas e produtores que se enmarquen dentro dos valores que defende este mercado, a participar e dar visibilidade tamén aos seus produtos.

O evento terá lugar o próximo 1 de novembro no Hotel NH Collection Finisterre da Coruña, que abrirá as súas portas de 12.00 a 21.00 horas para todos aqueles que queiran coñecer máis en profundidade a historia dos faros de Galicia, que se atoparán cun programa de actividades moi completo. O Mercado dos Faros contará con postos de artesanía, de alimentación, de complementos e de arte, que ampliarán e enriquecerán a oferta dunha xornada que pón o foco na divulgación, pero tamén na colaboración sectorial.

O evento terá lugar o próximo 1 de novembro no Hotel NH Collection Finisterre da Coruña, que abrirá as súas portas de 12.00 a 21.00 horas

Así pois, o Mercado dos Faros xurdiu tamén para poñer en valor un selecto número de marcas galegas, asociándoas simbolicamente coa figura dos Faros. Dentro destas marcas atópanse exemplos de gastronomía, deseño téxtil e complementos, pero tamén artesanía, complementos do fogar… en xeral, todas aquelas propostas que teñan relación ou estean vinculadas dun ou outro xeito co mar.

Concurso de arte

De igual forma, o Mercado dos Faros busca fomentar a cultura e a arte, cun certame de pintura rápida do faro protagonista: a Torre de Hércules. Cada participante deberá presentar o lenzo para cuñalo a partir das 11.00 horas, e deberá entregar a súa obra antes das 15.00 horas no propio Hotel NH Finisterre. Todos os debuxos serán expostos a partir das 17.00 horas para poder participar na votación, que correrá a cargo dun xurado profesional e tamén do voto popular.

A entrega de premios será ás 18.30 horas e, a partir de aí, cada autor poderá poñer un prezo á súa obra, permanecendo aberto o «mercado da arte» ata as 21.00 horas. Os galardóns desta actividade artística son: 150 euros para o gañador; unha tarxeta regalo de Jasp Art 120 euros para o segundo clasificado; e unha tarxeta regalo de Jasp Art de 80 euros para o terceiro clasificado.

O Mercado dos Faros busca fomentar a cultura e a arte, cun certame de pintura rápida do faro protagonista: a Torre de Hércules

Tamén haberá espazos para poder comprar e coñecer os produtos expostos de primeira man, con música en directo. E, a xoia da coroa, ofreceranse paseos ata o Faro para remarcar a emblemática figura dos mesmos e poder coñecer a contorna da Torre de Hércules en maior profundidade. Esta visita terá un aforo máximo de 20 prazas, e sairá do NH Finisterre nunha espectacular ruta guiada ata o faro protector da cidade herculina. Tamén se obsequiará cunha entrada á Torre de Hércules aos participantes.

A inscrición é gratuíta, e poderá realizarse a través da páxina web. Baixo o lema «A mirada da Torre», o Mercado dos Faros remarca e pón en valor a contorna da Torre de Hércules, escenario que centrará esta xornada e que impregnará todas e cada unha das actividades que se organicen no marco desta particular iniciativa de promoción e difusión turística, que conta co apoio da Xunta de Galicia; Turismo de Galicia; a Deputación da Coruña, coa «Paisaxe que Sabe» e o Mercado da Deputación da Coruña; e Turismo da Coruña; e Cuarenta & Cuatro Faros.