“Participar no Circuíto TUR 43 permítenos dar a coñecer Bico de Xeado nun contexto ligado ao deporte e ao turismo”

Para José Luis Cabarcos, levar o sabor galego alén das fronteiras da comunidade é un dos obxectivos de Bico de Xeado, a recoñecida cooperativa láctea que transforma leite de calidade en xeados saudables e innovadores. A súa participación no Circuíto de Golf e Croquet TUR 43 e no Mercado de Produtores, organizado en colaboración coa Deputación da Coruña, celebrado o pasado 19 de setembro no hotel Oca Puerta del Camino de Santiago de Compostela, abre novas vías para conectar coa clientela en espazos onde o deporte, a gastronomía e o turismo se dan a man.

O Circuíto de Golf e Croquet TUR 43 fusiona deporte, gastronomía e turismo. ¿Que valor lle aporta como produtor participar nun evento enmarcado neste circuíto, que atrae a xogadores do norte de España e Portugal?

Para nós, como produtores, participar nel representa unha oportunidade para dar a coñecer o noso produto e que se entenda un concepto gastronómico nun ámbito deportivo, especialmente, en campos de fóra de Galicia nos que poder dar a coñecer Bico de Xeado.

Cal cre que é a importancia de iniciativas como o Mercado de Produtores da Deputación da Coruña á hora de dar a coñecer os produtos gastronómicos da provincia?

É unha moi boa iniciativa de promoción por parte da Deputación da Coruña, que permite dar a coñecer toda a diversidade gastronómica que ten que ofrecer a provincia.

Para nós, como produtores, participar nel representa unha oportunidade para dar a coñecer o noso produto

Xa participara algunha vez nalgún destes proxectos da Deputación da Coruña? Que vantaxes ten promocionarse xunto con outros produtores?

É a primeira vez que participamos e estamos moi contentos coa iniciativa por parte da Deputación. Sería estupendo que se mantivese no tempo, xa que este tipo de accións permiten que accedamos a persoas de diferentes lugares que non coñecían a nosa marca e que agardamos que queden convencidos e satisfeitos coa súa calidade.

Este tipo de accións permiten que accedamos a persoas de diferentes lugares que non coñecían a nosa marca

Que é o que máis destaca dos seus produtos? Por que os escollen os consumidores e que é o que máis valoran?

Como produtores lácteos, porque somos cooperativa láctea, o que fixemos foi darlle un valor engadido ó leite, creando un produto diferencial como é o xeado. O que facemos en Bico de Xeado é respectar os sabores, a materia prima e, especialmente, facer un perfil nutricional adecuado, escapando de aspectos como tipo golosina ou doces, e levando a un perfil nutricional que permita, ademais, converter o xeado e o desfrute nun elemento saudable.