Carmen Sánchez: “Todo o que sexa divulgación e promoción para os nosos produtores é magnífico”

A empresa galega Galuriña, con sede en Esteiro (Muros, na provincia da Coruña), vén de recibir o Premio de Excelencia á Innovación para Mulleres Rurais, na categoría de actividade pesqueira e acuícola, concedido polo Ministerio de Agricultura, Pesca e Alimentación. Este galardón recoñece o seu labor innovador que combina a tradición panadeira e os recursos mariños da ría de Muros e Noia: nas instalacións de Galuriña elabóranse pans, empanadas e pizzas enriquecidos con algas recollidas directamente pola súa fundadora, Carmen Sánchez.

Aproveitamos a súa presenza no Mercado de Produtores organizado no marco do Circuíto de Golf e Croquet TUR 43, en colaboración coa Deputación da Coruña, que se celebrou o pasado 19 de setembro no hotel Oca Puerta del Camino de Santiago, para afondar no seu proxecto empresarial e nas razóns que a levaron a innovar no sector agroalimentario galego.

Que opinas de que se celebre un mercado de produtores da provincia da Coruña para dar a coñecer os seus produtos?

Para min é un dos eventos que visibiliza o que é o noso produto, o produto galego. Sabemos que somos produtores moi pequenos, a maioría dos que vimos, e ter visibilidade nun evento coma este, é unha oportunidade para dar a coñecer o noso nome, o que facemos… Todo iso non se podería facer, se non é nunha feira gastronómica coma esta.

Paréceche importante que a Deputación, con este mercado e con outras iniciativas semellantes, aposte por dar a coñecer os produtos da provincia?

Todo o que sexa divulgación e promoción para os nosos produtores é magnífico, porque sérvenos para estar presentes. Economicamente non estamos nunha posición coma as grandes empresas, que teñen esas posibilidades. Nós funcionamos a base de agruparnos; calquera acción que se faga para a divulgación suma, nunca resta. E, neste caso, vai sumar moito.

Xa participaras nalgunha iniciativa deste tipo da Deputación?

Non. É a primeira vez que veño cunha iniciativa da Deputación. A verdade é que houbo algunhas ocasións nas que me chamaron, pero unhas veces non podía e outras coincidíame con feiras. Ademais, necesitaba ter un transporte adaptado. Agora, que teño unha furgoneta, si que podo asistir. Pero é a primeira vez que veño cunha iniciativa deles.

En que feiras estivo Galuriña presente este ano?

Pois vou ás feiras bio, ás ecolóxicas, porque eu estou certificada en ecolóxico. Estou en todas as feiras bio: Madrid, Barcelona, A Coruña… Outras veces estiven no País Vasco, en León… Vou a aquelas feiras onde creo que o meu produto ten máis visibilidade, onde hai un canal máis directo cara ao consumidor final, porque todo se concentra alí. Tamén estou noutras feiras máis pequenas, da miña contorna rural. Aí tamén participo, porque creo que é necesario que no rural, no contorno máis próximo, esteamos presentes.

E que é o que máis lles gusta aos consumidores dos teus produtos?

Pois creo que todo, en xeral. As empanadas, por exemplo, que sempre pensamos que son para xente de mediana idade, tamén as estou vendendo en colexios, e aos nenos encántanlles. Sorpréndenlles moito, e ademais son moi nutritivas. Creo que encaixan moi ben como opción saudable. E despois, as pizzas, que teñen un público moi amplo, porque gustan en todas as idades. Tamén sorprenden moito os pans, especialmente os de hamburguesa. O que pasa é que eu son unha produtora pequeniña, e non dou feito para cubrir toda a demanda que podería ter.

“Agora estou nunha etapa de investigación coa doutora Ana Belén Crujeiras, do Hospital Clínico de Santiago, no eido da nutrición e dos procesos oncolóxicos”

Todos os produtos de Galuriña inclúen algas?

Si, todo o que eu fago leva algas. Eu son mariscadora e son panadeira, por dicilo dalgunha maneira. Vou ao mar, recollo as algas, e fago todos os procesos: dende a recolección, lavado, deshidratación, moído… A partir de aí elaboro as pizzas, os macerados, etc. En realidade, o quid da cuestión está nos macerados. É como unha especie de fermento ou “levadura viva”, onde van todos os nutrientes das algas, e con iso fago a masa nai. A partir diso, fago as pizzas, por iso son máis nutritivas e máis dixestivas.

Galuriña é un proxecto pioneiro. ¿Podes desvelar algunha novidade?

Creo que é o primeiro proxecto deste tipo a nivel europeo; que eu saiba, non hai nada igual. Fun crecendo por casualidade, sen buscalo. Pouco a pouco fun innovando e coñecendo mellor as características das algas, que ao principio non sabía ben como se comportaban no mundo das masas. Agora mesmo estou nunha etapa de investigación coa doutora Ana Belén Crujeiras, do Hospital Clínico de Santiago de Compostela, no eido da nutrición e dos procesos oncolóxicos. Queremos investigar como estes macerados inflúen en persoas con intolerancias, diabetes, enfermidade de Crohn… Estamos traballando niso.

Entón, agora estás centrada nas aplicacións das algas en novos eidos?

Si, porque estes macerados poden ser moi beneficiosos para persoas que queiran participar en ensaios clínicos, e tamén poderían supoñer un cambio para a industria alimentaria tal como a coñecemos. Imaxina facer pan con nutrientes reais: sería consumir pan de verdade, nutritivo. Eses fermentos poden revolucionar tamén o mundo do viño ou da cervexa, porque teñen moitas aplicacións. Axudan a levedar máis rápido, acurtan os tempos de fermentación das masas, e iso tamén ten unha repercusión económica positiva, porque aforras tempo e recursos.