Gerardo Velando: “O cliente valora en Raizame o incrible sabor das nosas elaboracións”

Raizame é unha empresa familiar creada da ilusión compartida por desenvolver un proxecto en común. A empresa naceu en Meirás, no concello coruñés de Valdoviño, impulsada polos irmáns Velando. Todo comezou cunha receita caseira, que serviu de punto de partida para crear unha marca cunha identidade propia. A partir de aí, foron dándolle forma ao seu soño. Gerardo Velando conta con formación en repostaría e ampla experiencia en pastelerías e restaurantes. Os seis irmáns converteron este proxecto nunha paixón: a elaboración artesanal de doces, galletas e pastas cun forte vencello co territorio.

Os produtos de Raizame son elaborados de forma artesanal, con ingredientes de sempre, sen aditivos nin conservantes, e destacan polo seu sabor intenso, pola coidada selección de materias primas e pola súa presentación sinxela pero elegante. Traballan con mimo cada detalle para ofrecer produtos que evoquen os sabores de toda a vida, mantendo como valores fundamentais a honestidade, a paixón e o respecto pola tradición reposteira galega.

Raizame conseguiu levar os seus doces a tendas delicatessen de toda Galicia, grazas á calidade dos seus produtos e ao coidado posto en cada elaboración. Un dos máis destacados é o Meiriño, un doce con base de fariña de améndoa e marmelo natural, cuberto cun glaseado de limón, que rende homenaxe á súa terra natal, Meirás.

O pasado 19 de setembro, Raizame participou no Mercado de Produtores organizado no marco do Circuíto de Golf e Croquet TUR 43, en colaboración coa Deputación da Coruña, que se celebrou no hotel Oca Puerta del Camino de Santiago de Compostela. Alí, os participantes degustaron os doces tradicionais de Raizame, que transmiten sabor, memoria e identidade.

Que supón para Raizame participar no Mercado de Produtores enmarcado no Circuíto de Golf e Croquet TUR 43, que atrae a xogadores do norte de España e Portugal?

Nós, como produtores galegos, sentímonos orgullosos de dar a coñecer a gastronomía local a través das nosas elaboracións.

Cal cre que é a importancia de iniciativas como este Mercado organizado en colaboración coa Deputación da Coruña á hora de dar a coñecer os produtos gastronómicos da provincia?

Son iniciativas moi importantes porque poñen en valor e axudan a coñecer o traballo dos produtores artesáns. Estes proxectos fomentan o consumo local e dan visibilidade á calidade dos produtos que se elaboran na provincia da Coruña.

“Sentímonos orgullosos de dar a coñecer a gastronomía local a través das nosas elaboracións”

Raizame xa participara algunha vez nalgún destes proxectos da Deputación da Coruña?

Xa participaramos con anterioridade en proxectos da Deputación e sempre é un pracer coincidir cos compañeiros e compartir tempo, produtos e impresións.

Que é o que máis destaca dos produtos elaborados por Raizame?

Os nosos produtos destacan pola súa calidade e o seu sabor. As materias primas que empregamos son do mellor no mercado e iso fai que o produto final sexa excelente.

“Estes proxectos fomentan o consumo local e dan visibilidade á calidade dos produtos que se elaboran na provincia da Coruña”

Por que os escollen os consumidores e que é o que máis valoran?

O cliente valora en Raizame o incrible sabor das nosas elaboracións, a variedade de produtos que ofrecemos, feitos de xeito artesán e con ingredientes de toda a vida.

Dende a súa experiencia, que vantaxes ten o feito de promocionarse xunto con outros produtores do mesmo territorio?

Estes encontros fannos valorar, aínda máis se cabe, o traballo dos nosos produtores e a calidade das elaboracións que se fan na actualidade.