María Toceda: “Para nós o café non é só unha bebida: é unha forma de vivir”

Cafés Lúa foi outra das marcas que estivo presente no Mercado de Produtores organizado o venres 19 de setembro no Hotel Oca Puerta del Camino de Santiago no marco do Circuito de Golf e Croquet TUR 43, en colaboración coa Deputación da Coruña. Alí, esta firma, que leva máis de 36 anos compartindo a súa maneira de entender o café, demostrou aos asistentes ao Mercado que a provincia coruñesa é “un escaparate gastronómico único”, como sinala a directora de operacións de Cafés Lúa, María Toceda.

Que vantaxes ten para Cafés Lúa participar nun evento enmarcado no Circuíto de Golf e Croquet TUR 43, que atrae a xogadores do norte de España e Portugal?

Para nós é unha oportunidade perfecta para dar a coñecer o noso café: artesán, de calidade e sostible, tostado en Carballo. Este circuíto non fala só de deporte, turismo ou gastronomía, senón de experiencias que unen persoas e lugares. E o café encaixa á perfección neste relato: é a pausa que invita a parar, o intre que se comparte, o sabor que queda na memoria. Que os xogadores poidan gozar do noso café significa tamén achegarlles un anaquiño da nosa terra, porque os sabores de Galicia falan tanto dela como a súa paisaxe ou a súa cultura.

Que importancia teñen as iniciativas como este Mercado de Produtores da Deputación da Coruña para dar a coñecer a gastronomía coruñesa?

Iniciativas como esta son clave para poñer en valor os produtos gastronómicos da provincia. Estes mercados fannos visibles, axudan a crear comunidade e permiten que os consumidores coñezan a historia que hai detrás de cada produto. No noso caso, que vexan que detrás dunha taza hai un proceso artesanal, un ‘tueste’ verde –utilizamos pellets de madeira– e moito amor polo café.

“Este circuíto non fala só de deporte, turismo ou gastronomía, senón de experiencias que unen persoas e lugares”

Cafés Lúa xa participara antes nalgún dos proxectos da Deputación da Coruña?

Levamos tempo colaborando coa Deputación en diferentes proxectos, e valoramos moito a confianza e a oportunidade. O bonito destes proxectos é que imos da man doutros produtores que tamén cren na calidade e no valor do territorio. Iso multiplica o impacto, porque o consumidor pode descubrir varias marcas nun mesmo espazo, probar, comparar e ver que a nosa provincia é un escaparate gastronómico único. Ademais, créanse sinerxías moi interesantes entre nós, que tamén suman.

“Os sabores de Galicia falan tanto dela como a súa paisaxe ou a súa cultura”

Que é o que máis destaca dos seus produtos?

En Cafés Lúa levamos máis de 36 anos compartindo a nosa maneira de entender o café: artesán, sostible e con identidade propia. O noso xeito de traballar baséase en dar valor ás pequenas cousas, que son as que fan grande un café. Quen nos escolle sabe que aquí vai atopar proximidade, calidade e un sabor real. Porque para nós o café non é só unha bebida: é unha forma de vivir, con respecto polo que nos rodea, con amor polo que facemos e coa ilusión de compartilo con quen queremos.