Mónika Romero: “Galicia ten unha riqueza infinita”

BenSenta está especializada en repostería elaborada de xeito artesanal sen azucres engadidos, nin glute nin leite. Ese é parte do segredo do éxito dos seus biscoitos, das súas tortas, dos seus pans e dos seus bocadiños, feitos con materias primas de gran calidade. A súa aposta polos produtos ecolóxicos, de tempada e de proximidade é outro dos valores diferenciais de BenSenta, moi aprezados polos consumidores, segundo destaca a súa fundadora, Mónika Romero.

O pasado 19 de setembro, BenSenta participou no Mercado de Produtores organizado no marco do Circuíto de Golf e Croquet TUR 43, en colaboración coa Deputación da Coruña, que se celebrou no hotel Oca Puerta del Camino de Santiago de Compostela, onde Mónika Romero deu a coñecer a súa repostería nutritiva e saudable, que se pode mercar online, ademais de atopala na súa tenda da cidade herculina.

Como valora que se organice este Mercado de Produtores para dar a coñecer os produtos gastronómicos da provincia de xeito conxunto?

Pois paréceme unha idea bárbara, porque, doutra maneira, os que somos pequerrechos non temos maneira de poder chegar a todos os nichos aos que necesitamos chegar.

Este mercado enmárcase no seo do Circuíto TUR 43, que atrae xogadores de Asturias, Galicia e Portugal. Que lle parece a iniciativa para que a xente tamén doutros territorios coñeza os produtos da provincia coruñesa?

Esta iniciativa paréceme moi positiva, porque o noso nicho de mercado é a repostería nutritiva; é repostería para a xente que se quere coidar. Entón, nós estamos encantados de participar neste tipo de eventos. Tamén se asocia o deporte coa saúde, xa que o noso é un produto para coidarse, para nutrirse ben, para que sente ben: BenSenta, senta ben. Estamos encantadas por esta oportunidade. É moito traballo, porque somos pequerrechos e temos que abrir a tenda pola mañá e vir aquí pola tarde, pero paga a pena, a verdade.

“Nós somos un obradoiro sen glute, sen leite e sen azucre refinado; todo integral, con produto de proximidade”

E que produtos traen nesta ocasión?

Traemos unha pequena mostra, porque realmente non nos dá para poder traer todo o que nos gustaría. Aparte dos biscoitos e das coquiñas, tamén temos uns bocadiños que son a base de dátil, froitos secos, froita, produto de tempada, etc. Iso, a nivel deportivo, é similar ás barras enerxéticas: tómalos e quedas moi saciado. Pero non nos dá para traer realmente todo o que quixeramos.

Xa participaran algunha vez nunha iniciativa semellante organizada pola Deputación da Coruña?

Só participei no Festival da Luz. É un gran momento para a aprendizaxe, porque realmente eu son nova na aventura de emprender. E sempre aprendes, sempre coñeces a xente marabillosa, porque, a fin de contas, todos estamos no mesmo, e é unha plataforma fantástica para poñer en valor o noso traballo como artesáns, como pequeno comercio; é fantástico. Realmente ten vantaxes, porque podes unificar sinerxías. Nós somos un obradoiro sen glute, sen leite e sen azucre refinado. Todo integral, con produto de proximidade. E sempre coñeces a alguén que te complemente. É unha maneira tamén de arrouparnos e de axudarnos entre nós a tecer unha rede de sostemento, porque isto é unha carreira de fondo moi dura.

“O noso nicho de mercado é a repostería nutritiva, para a xente que se quere coidar”

Que é o que máis lles gusta aos consumidores dos produtos BenSenta?

O que máis lles gusta é que imos pasiño a pasiño e que son produtos reais. Todos os ingredientes aparecen na etiqueta, porque eu teño a máxima de poñer sempre todo na etiqueta, e os consumidores comen máis tranquilos. E son produtos de calidade porque non utilizamos calquera fariña: é todo ecolóxico e de proximidade. Moitas veces dinme “sabe moito a boniato”, porque, aparte de levar moito boniato, leva un gran boniato das leiras de por aquí. E nótase que son produtos de proximidade. Hai cousas que non poden ser de aquí, como o plátano ou o dátil, aínda que en Pontevedra xa se empezan a cultivar o mango e o aguacate, por exemplo. Isto é moi interesante porque ao final Galicia ten unha riqueza infinita; é amable con outros produtos que reconverten un pouco o que é a horta local e iso é marabilloso.